Category Archives: Novas
Falece Valentín Arias
Foi un dos pais da Asociación de Tradutores Galegos, xerente da editorial Galaxia e asinou as traducións para o galego dalgúns títulos fundamentais da literatura. Valentín Arias falecía o pasado venres en Lugo aos 77 anos de iadade.
Deixa tras de si unha importante pegada nas nosas letras, con obras como A lingua galega na escola, A escola rural en Galicia, Lois e Sabela ou Como se fai um libro?.
Entre outras traducións, asinou as versións galegas de obras como As aventuras de Tintín (Hergé), Viaxe ó centro da terra (Verne), Voo de noite (Saint-Exupéry), O xardín (M. Duras) ou O estranxeiro (Camus).
Nas Bibliotecas Municipais pódense atopar numerosos refrendos das suas obras:
- Robinson Crusoe / Daniel Defoe; versión de Ramón García Toga ; tradución de Valentín Arias
- Pantasma de Canterville / Óscar Wilde ; versión de A. G. Llorca ; tradución de Valentín
- Arias Mondo e outras historias / J.M.G. Le Clézio ; traducción de Raquel Villanueva e Valentín Arias
- Avelino Pousa Antelo : galeguista, docente, cooperativista, escritor, político e animador cultural / Valentín Arias
O 25% das editoras venderá un libro dixital por cada un en papel
Unha de cada catro editoriais españolas espera comercializar en versión dixital máis da metade do seu catálogo en 2012. Esta é unha das principais conclusións que se desprenden da segunda enquisa sobre o Libro Dixital en España realizada pola Federación de Gremios de Editores de España (FGEE) en colaboración coa Fundación Germán Sánchez Ruipérez. Segundo este estudo, o 75% das editoriais dispón xa dun proxecto dixital e está a realizar ou creación de obra exclusivamente dixital.
Cabe destacar que é o sector do cómic o que máis amplamente se está a introducir no mundo dixital -o 94% das editoriais ten proxecto dixital en curso-, fronte a outros como o da literatura infantil e xuvenil ou o das ciencias sociais e humanas, nos que unha de cada cinco editoriais din non ter prevista ningunha iniciativa.
En canto ao formato de dixitalización, o ePUB é o que maior crecemento está a experimentar. O 40% das editoriais empregárono en 2010, fronte ao 24% de 2009. Aínda que se espera que esta porcentaxe creza até alcanzar o 70% durante 2011, compartindo protagonismo co PDF, que comeza, a partir de 2012 a decrecer. O formato Mobipocket -tanto xenérico como o específico para Kindle- duplica a súa presenza en relación ao ano anterior pero só o utilizará o 15% das editoriais en 2012. Os formatos para pizarra dixital tamén duplicarán a súa presenza, pero circunscribiranse principalmente ás editoriais de libro de texto non universitario, enciclopedias e dicionarios, literatura infantil e xuvenil e relixión. En canto aos dispositivos, os e-readers e os computadores son as contornas de lectura maioritariamente preferidos polas editoriais para comercializar obra dixital, preto do 80% das editoriais inclínase por ambos. Ao longo de 2011, os e-readers superarán aos computadores, especialmente nas materias de literatura, literatura infantil e xuvenil, ciencias sociais e humanas, relixión, libros prácticos e divulgación xeral. Outro dato de interese que reflicte o estudo é que para este ano se espera un incremento das obras para tabletas e teléfonos móbiles. Preto da metade das editoriais comercializará produtos para estas contornas, máis para tabletas que para móbiles.
Respecto das canles de distribución, dúas son as preferidos polas editoriais para comercializar obra dixital: as plataformas comerciais xenéricas e a venda directa desde a web da editorial. Os grandes grupos editoriais optan, sobre todo, pola distribución de contidos por medio de plataformas conxuntas con outras editoriais (60%) e pola comercialización nas librarías (60%). As editoriais de gran tamaño, tamén optan pola venda mediante plataformas comerciais xenéricas (100%), por medio de librarías (75%) e na propia web (50%). Por outra banda, en 2011 e 2012, a tendencia que se observa é que o prezo da obra dixital sexa inferior ao da impresa, polo menos un 30% máis barato. Unha de cada catro editoriais consultadas considera que a redución podería alcanzar o 50%. Esta tendencia é máis significativa nas editoriais de literatura, de literatura infantil e xuvenil e de ciencias humanas e sociais.
Mercedes Queixas retratará as vidas de Pereiro e Kruckenberg
A escritora Mercedes Queixas anda a ultimar dúas obras divulgativas sobre a vida e a traxectoria literaria de dous poetas moi diferentes: Lois Pereiro e María do Carme Kruckenberg. O libro sobre o autor a quen se lle dedica o Día das Letras Galegas sairá publicado na editorial Laiovento a finais deste mes. Galaxia, pola súa banda, será a encargada de editar a biografía de Kruckenberg que prepara Mercedes Queixas.
Fonte: Xornal
Finalistas dos Premios AELG 2011
Os socios e socias da AELG xa escolleron os finalistas aos premios á mellor obra publicada no 2010 nas modalidades de ensaio, poesía, narrativa, tradución, teatro, blog literario, literatura infanto-xuvenil e traxectoria xornalística. Nestes dous últimos casos tamén participan na elección os asociados de Gálix e os membros do Colexio de Xornalistas respectivamente.
As obras gañadoras daranse a coñecer na Cea das Letras, un dos actos máis importantes na vida da Asociación de Escritores en Lingua Galega, que terá lugar o vindeiro 30 de abril no hotel Porta do Camiño de Santiago de Compostela.
Así pois, da conxunción de votos emitidos nunha primeira quenda resultaron finalistas:
Blog Literario
1. Ferradura en tránsito, de Xosé Manuel Eyré.
2. O levantador de minas, de Alfredo Ferreiro.
3. Trafegando ronseis, de Gracia Santorum e Xosé Anxo Fernández Alonso.
– Ensaio
1. A man que caligrafando pensa: do plástico-escritural e da manuscrita novoneyriana, de Carlos Paulo Martínez Pereiro.
2. Elucidacións na sombra. Análise e interpretación de dúas pezas de Carvalho Calero, de Manuel Castelao.
3. O clamor da rebeldía. Rosalía de Castro: ensaio e feminismo, de María Pilar García Negro.
– Literatura Infanto-xuvenil (AELG-Gálix)
1. Contos para nenos que dormen deseguida, de Pinto & Chinto.
2. O pintor do sombreiro de malvas, de Marcos Calveiro.
3. O segredo de Marco Polo, de Francisco Castro.
4. Suso Espada. “Nota Roja”, de Francisco X. Fernández Naval.
– Mellor traxectoria en xornalismo cultural 2010 (AELG-Colexio de Xornalistas)
1. Anxo Tarrío.
2. Daniel Salgado.
3. Fran P. Lorenzo.
4. Iago Martínez.
5. Ramón Nicolás.
– Narrativa
1. O coitelo en novembro, de Marilar Aleixandre.
2. Obediencia, de Antón Lopo.
3. Periferia, de Iolanda Zúñiga.
4. Settecento, de Marcos Calveiro.
5. Todo é silencio, de Manuel Rivas.
6. Xuvia-Neda, de Vicente Araguas.
– Poesía
1. Bater de sombras, de Francisco X. Fernández Naval.
2. Estremas, de Ana Romaní.
3. Retro(visor), de Antía Otero.
– Teatro
1. Canibalismo, de Marcos Abalde Covelo.
2. Cínicas, de Teresa Moure.
3. Flores de Dunsiname, de Manuel Lourenzo.
– Tradución
1. Bilbao-New York-Bilbao (Kirmen Uribe), na versión de Isaac Xubín.
2. Lóbrego Romance. Pálida Pantasma. As Lendas Espectrais de Malvadia (Jack Mircala), por Isabel Soto.
3. Randea do alento (Herta Müller), de Marga do Val.
Máis info:
AP-9 Ingeniería Cultural | Festival SINSAL 9
AP-9. Enxeñaría cultural é o título do encontro que organiza o Festival Sinsal na Coruña os vindeiros 8 e 9 de abril. A proposta pretende explorar as últimas tendencias en xestión cultural atendendo a cuestións como a busca de financiamento para proxectos, as posibilidades das novas tecnoloxías ou o traballo en rede. De xeito paralelo, o Festival organiza unha extensión no garaxe de Expocoruña centrada en propostas musicais de carácter experimental. Diva Dompé, Fm Eiheit e Massimo Pupillo, Live Footage ou Raime son algunhas das propostas que se poderán contemplar ao vivo no evento.
Máis Info: Sinsal
Biblioteca do Fórum: ciclo “De película”, os mércores de febreiro e o 2 de marzo ás 19:30 h.
Todos os mércores do mes de febreiro, con motivo da reinauguración da Biblioteca do Fórum, e dentro das actividades de “Biblioteca do Fórum: estamos de volta“, terán lugar estas conferencias, baixo o título xenérico de “De película”, todas elas dirixidas a un público maior de 14 anos e con entrada libre até completar capacidade (na do 2 de marzo será precisa inscrición previa):
– Mércores 9. 19:30 h.: “Encontro co director de cine Oliver Laxe“, xa recoñecido internacionalmente a pesar da súa xuventude.
– Mércores 16. 19:30 h.: “Sempre nos quedará o Fórum. Números do negocio cinematográfico”, por Martin Pawley. “Agora que algúns se empeñan en recitar coma un mantra que a crise é por culpa da piratería. O caso é que en Francia 2010 foi o mellor ano en número de espectadores dos últimos corenta anos en Italia viviron o mellor ano da década, en Finlandia duplicaron a venda de entradas, en Arxentina foi de fábula… e noutros países non, claro. Falar diso, dos novos espazos de negocio, os visionados online, explicar como en Francia tamén as salas comerciais “programan”, ordenan ben as proxeccións para fidelizar o público”.
– Mércores 23. 19:30 h.: “Do audiovisual á literatura: proxección de curtas. Mr. Misto.” Proxección das curtas ‘Dous homes e un suicidio’, unha comedia de Iria López; ‘O soldadiño de chumbo’, de Virginia Curiá e Tomás Conde e ‘A flor máis grande do mundo’, de Pablo Etcheverry, baseada no relato de Saramago. As tres pezas serán presentadas brevemente polos seus directores, e ó fin do visionado o público poderá entablar conversa con eles para charlar acerca do audiovisual e a súa relación coa literatura.
– Mércores 2. 19:30 h.: “Obradoiro: No ollo da arte. Un xeito de entender a literatura a través da arte”, por Antía Otero. Con inscrición previa. Obradoiro destinado a tod@s @s interesad@s na arte, na literatura, na expresión, na ollada, na linguaxe… dunha maneira lúdica e interdisciplinar.
Biblioteca do Fórum: ciclo de conferencias “Para saber +”, todos os luns de febreiro ás 19:30 h.
Todos 
os luns do mes de febreiro, con motivo da reinauguración da Biblioteca do Fórum, e dentro das actividades de “Biblioteca do Fórum: estamos de volta“, terán lugar estas conferencias, baixo o título xenérico de “Para saber +”, todas elas dirixidas a público adulto e con entrada libre até completar capacidade:
– Luns 7. 19:30 h.: “A granxa agrícola de Monelos”, por Tino Fraga, director dos Museos Científicos Coruñeses. A “Granxa Agrícola Experimental”, creada en 1888 e con actividade en Monelos ata 1964, foi o primeiro centro de experimentación e difusión de novas técnicas agrícolas creado en Galícia e Asturias. Asemade, a Granxa formou parte da cidade da Coruña, dos seus espazos e da vida social.
– Luns 14. 19:30 h.: “Ser pai e nai na internet”, por Jorge Castro Ruso. Abórdanse as maneiras en que os pais e nais poden interactuar cos seus fillos en relación ás novas tecnoloxías.
– Luns 21. 19:30 h.: “Territorios literarios. A Coruña de Luísa Villalta“, por María Casar. As relacións entre o mundo da creadora e o mundo representado na súa obra. Faremos un percorrido pola Coruña reflectida na obra poética de Luísa Villalta tratando de atopar as claves que, como lectores, podemos anovar desde a nosa perspectiva.
– Luns 28. 19:30 h.: “Mulleres galegas e ciencia”, por Iolanda Fernández Casal. Cada vez son máis as mulleres dedicadas con éxito a todos os campos da investigación e Investigadoras galegas pretende visibilizar isto a través do testemuño de cen expertas nos seus respectivos campos. Porén, os atrancos que atopan as mulleres na carreira científica seguen sendo moitos.
Biblioteca do Fórum: ciclo de conferencias En feminino
Todos os martes do mes de febreiro, con motivo da reinauguración da Biblioteca do Fórum, e dentro das actividades de “Biblioteca do Fórum: estamos de volta“, desenvólvese o ciclo “En feminino”, todas elas dirixidas a público de máis de 14 anos e con entrada libre até completar capacidade:
– Martes 8. 19:30 h. “Moita poesía, pouca diversión”, con Lucía Aldao e María Lado. Peza híbrida e pouco convencional na que mesturan poesía desenfada, música e performance, que pretende chamar a atención daqueles que miran a poesía de reollo. Para iso sérvense da provocación, que só encerra unha verdade: para elas a lectura de poesía non pode ser algo que adormeza ao espectador. Partindo deste presuposto Aldao e Lado presentan un recital de poesía ameno, dotado de ritmo e comunicación aberta co espectador, no que este adquire ademais un papel activo.
– Martes 15. 19:30 h.: “Recital multimedia”, con Yolanda Castaño. As novas tecnoloxías ao servizo da poesía desta recoñecida autora.
– Martes 22. 19:30 h.: “O porto da Coruña e a emigración de mulleres. Intertítulos para tres historias”, por Dores Tembrás, no que se xunta historia e narración para acceder á verdade.
– Martes 1 de marzo. 19:30 h.: “Entre o universo e a tinta”, por Estíbaliz Espinosa, coa rigorosa profundidade desta poeta na súa abordaxe da relación entre literatura e realidade.
Antonio Gamoneda nomeado Escritor Galego Universal
Non escribe en galego, pero o “seu exemplo de coherencia e verdade poética” moi apegada a realidade acaba de valerlle a Antonio Gamoneda o recoñecemento de escritor galego universal. Esta mención, que xa posúen Mahmud Darwich, Pepetela, Nancy Morejón, Elena Poniatowska e Juan Gelman, concédea a Asociación de Escritores en Lingua Galega a aqueles autores que unen á excelencia literaria o compromiso ético que os converte en referentes na defensa da dignidade nacional e humana. Gamoneda recollerá o premio o 30 de abril, no marco da Cea das Letras, mentres que o 29 ofrecerá unha conferencia na cidade da Coruña.
Fonte: Cultura Galega
Blogs Clubs Lectura das Bibliotecas Municipais da Coruña 